ᒪᑭᕝᕕᒃ ᑫᒥᑦᓯᒍᑎᑦᓴᒥᒃ ᐋᑦᓯᓯᒪᔪᖅ ᕿᒻᒪᖁᓯᐊᓕᕆᔩᑦ ᑳᓇᑕᒥ ᑎᒥᖓᓄᑦ ᐱᑦᔪᑎᖃᕐᑎᓗᒍ ᐱᓇᓱᐊᑦᓴᒥᒃ ᒪᑐᒥᖓ “ᑲᒪᓂᖅ ᐃᓄᐃᑦ ᓄᓇᓄᑦ ᐊᑎᖏᓐᓂᒃ: ᓄᑖᖅ ᐃᓄᐃᑦ ᑐᓴᐅᒪᒍᑎᖓ ᐊᑐᕐᑐᖅ ᐅᖓᓯᑦᑐᓕᐊᕐᓂᒧᑦ, ᐅᓂᒃᑳᕈᑎᓄᑦ ᐊᒻᒪᓗ ᓄᓇᖕᖑᐊᓄᑦ”. ᐱᓇᓱᐊᕈᑎᒧᑦ ᑐᕌᕐᑕᐅᓂᕐᐹᖅ ᐃᓕᖓᓚᐅᔪᔪᖅ ᓱᕐᖁᐃᓂᕐᒧᑦ ᐱᑕᖃᓕᕐᑐᓂᒃ, ᐊᒻᒪᓗ ᓄᐊᑦᓯᓂᕐᒧᑦ ᓄᑖᓂᒃ, ᐃᓄᐃᑦ ᐱᐅᓯᑐᖃᒃᑯᑦ ᓄᓇᓄᑦ ᐊᑎᖏᓐᓂᒃ ᐊᒻᒪᓗ ᒪᓕᑦᑎᖏᓐᓂᒃ ᐅᓂᒃᑳᕈᑎᓂᒃ ᓄᓇᕕᐅᑉ ᑕᕆᐅᖁᑎᖓᑕ ᐃᓗᐊᓂ (NMR). ᐱᖑᐃᓂᖅ ᑖᑦᓱᒥᖓ ᐱᓇᓱᑦᑕᐅᔪᒥᒃ ᐃᓕᑕᕐᓯᒍᑕᐅᓪᓚᕆᒐᔭᕐᑐᖅ ᑖᒃᑯᓂᖓ ᓄᓇᓂᒃ ᐊᒻᒪᓗ ᖃᕆᑕᐅᔭᒃᑯᑦ ᐅᒃᑯᐃᕕᒻᒥ ᑕᒪᒃᑯᓂᖓ ᐊᑐᐃᓐᓇᐅᕈᐃᓗᓂ ᓇᐅᓕᒫᓄᑦ.

ᐱᓇᓱᑦᑕᐅᔪᖅ ᓴᓇᒍᑕᐅᓯᒪᔪᖅ ᐱᑕᖃᕇᕐᑐᑦ ᖃᐅᔨᒪᔭᐅᔪᑦ ᖄᖓᓄᑦ ᐱᓯᒪᔪᓄᑦ ᓯᕗᓪᓕᓂᒃ ᐱᓇᓱᑦᑕᕕᓂᕐᓂᒃ/ ᐱᔭᕇᕐᑕᕕᓂᕐᓂᒃ ᐊᕙᑕᖅ ᐱᐅᓯᑐᖃᓕᕆᕕᒻᒧᑦ (ᓄᓇᐅᑉ ᖄᖓᓂᒃ ᐱᓇᓱᐊᕈᑎᒥ (Nunatop) ᐊᒻᒪᓗ ᐃᓄᒃᑎᑐᑦ ᓄᓀᑦ ᐊᑎᖏᑦᑕ ᑲᑎᕐᓱᑕᐅᒍᑎᖓᓂ). ᓴᓇᓂᐊᕐᒪᑕ ᐱᑕᖃᓕᕐᑐᑦ ᐱᓇᓱᑦᑕᐅᓯᒪᔪᑦ ᖄᖓᓂ, ᐊᒻᒪᓗ ᓂᐳᕐᑎᓯᓚᖓᓗᓂ ᐱᒋᐊᓕᓐᓂᒃ ᐊᒻᒪᓗ ᐃᓱᒪᒋᔭᐅᔪᓂᒃ NILCA-ᒥ (ᐃᒫᒃ, ᕿᒥᕐᕈᒋᐊᑦᓯᐊᓂᖅ ᐱᐅᓯᑐᖃᕐᓂᒃ ᐊᑎᕐᓂᒃ ᓄᓇᕕᐅᑉ ᑕᕆᐅᖓᑕ ᐃᓗᐊᓂ ᐊᒻᒪᓗ ᐃᓕᑕᕐᓯᒍᑕᐅᑎᑦᓯᓂᖅ ᑖᒃᑯᓂᖓ ᐊᑎᕐᓂᒃ), ᐱᓇᓱᑦᑕᐅᔪᖅ ᐃᒣᓘᕈᑕᐅᒋᐊᖃᓚᐅᔪᔪᖅ:

ᑲᑎᕐᓱᐃᓂᖅ ᓄᑖᓂᒃ ᖃᐅᔨᒪᒍᑎᓂᒃ ᐱᓗᒋᑦ ᐃᓄᑐᖃᕐᓂᒃ.

ᓄᑕᐅᓯᓕᑎᕆᓂᖅ ᐊᒻᒪᓗ ᓱᕐᖁᐃᓂᖅ ᓄᐃᑕᓕᕐᑐᓂᒃ ᖃᐅᔨᒪᔭᓂᒃ.

ᐃᕐᐸᑎᑦᓯᓂᖅ ᖃᐅᔨᒪᒍᑎᓂᒃ ᐊᑐᕐᓗᓂ ᑲᒪᒋᐅᑎᕕᒻᒥᒃ ᖃᕆᑕᐅᔭᒃᑯᑦ ᐱᑐᕝᕕᒥᒃ ᐊᒻᒪᓗ

ᐃᓚᐅᑎᑦᓯᓂᖅ ᓄᓇᓕᓐᓂᒃ ᐊᑐᕐᓗᓂ ᐃᑲᔪᕐᑎᒌᒍᑎᒥᒃ ᐱᑐᑦᓯᒪᐅᑎᕕᒻᒥᒃ ᐊᑐᕈᑎᒥᒃ ᑌᑲᓂ ᖃᐅᔨᒪᔭᑦᓭᑦ ᓄᑖᑦ ᐃᓚᐅᕐᑑᑕᐅᒍᓐᓇᑎᓪᓗᒋᑦ ᐃᓚᐅᔪᓄᑦ ᐊᑐᕐᑎᓄᑦ.

ᐱᓇᓱᑦᑕᐅᓂᖓ ᐃᓘᓐᓇᒐᓚᓂ ᑮᓇᐅᔭᖃᕐᑎᑕᐅᓚᐅᔪᔪᖅ ᕿᒻᒪᖁᑎᓕᕆᔨᒃᑯᓄᑦ ᑳᓇᑕᒥ (ᐊᕐᖁᑎᖃᕐᑎᓗᒍ ᑳᓇᑕᒥ ᖃᕆᑕᐅᔭᑎᒍᑦ ᑲᒪᒋᐅᑎᒍᓐᓇᓂᕐᒥᒃ ᑮᓇᐅᔭᖃᕐᑎᓯᒍᑎᓂᒃ) ᐊᒻᒪᓗ ᒪᑭᕝᕕᒧᑦ ᐊᒻᒪᓗ ᑲᔪᓯᑎᑕᐅᓂᖓ ᐱᓇᓱᖃᑎᒌᒍᑕᐅᓚᐅᔪᑦᓱᓂ ᒪᑭᕝᕕᒧᑦ, ᐊᕙᑕᖅ ᐱᐅᓯᑐᖃᓕᕆᕕᒻᒧᑦ ᐊᒻᒪᓗ ᑕᒫᓂ ᓄᓇᒥ ᐃᓄᐃᑦ ᓄᓇᓕᖏᓐᓄᑦ.

ᐱᓇᓱᐊᑦᓴᒥᒃ ᐱᓇᓱᒍᑕᐅᓯᒪᔪᑦ

ᐱᓇᓱᐊᑦᓴᒥᒃ ᐱᓇᓱᐊᕈᑏᑦ ᐊᕕᑦᑐᓯᒪᓚᐅᔪᔪᑦ ᐱᖓᓱᓗᐊᖕᖑᐊᓄᑦ ᐱᓇᓱᒋᐊᓕᓐᓂᒃ ᑲᑎᕐᓱᐃᒪᒍᑎᓄᑦ:

ᕿᒥᕐᕈᒋᐊᓪᓚᓂᖅ ᐅᓪᓗᒥ ᖃᓄᐃᓐᓂᒥᒃ ᖃᐅᔨᒪᐅᓯᕐᒧᑦ ᖃᓗᓗᒋᑦ ᐱᑕᖃᓕᕐᑐᑦ ᓄᓀᑦ ᐊᑎᖏᓐᓂᒃ ᖃᐅᔨᒪᒍᑏᑦ, ᓯᕗᓪᓕᕕᓃᑦ ᐊᑦᔨᖑᐊᖏᑦ, ᓂᐲᑦ ᐊᒻᒪᓗ ᑕᑯᓐᓇᕋᑦᓭᑦ ᐊᒻᒪᓗ ᓇᓗᓀᕐᓯᓂᖅ ᓱᓇᖃᖕᖏᓗᐊᕈᑎᓂᒃ ᐊᒻᒪᓗ ᐃᓚᑯᓂᒃ ᖃᐅᔨᒪᔭᑦᓴᓂᒃ. ᐊᑐᐃᓐᓇᕈᐃᓂᖅ ᐃᓕᓐᓂᐊᕈᑎᑦᓴᓂᒃ ᐊᑐᕐᑐᓴᓂᒃ ᓄᓇᓕᓐᓂᒃ ᓱᒪᑦᓴᓯᐅᕐᓂᒧᑦ ᖃᓗᓗᒋᑦ ᐊᑕᖏᑉᑐᑦ ᐊᑕᐅᓯᐅᓈᕐᑎᑐᓪᓗ ᐊᐱᕐᓱᑕᐅᒍᑎᖏᑦ, ᐊᑦᑐᐊᔪᑦ ᐊᑐᐃᓐᓇᕈᑦᑎᓂᕐᒧᑦ ᓄᓇᖕᖑᐊᓂᒃ ᑐᕌᕐᑐᓂᒃ ᓄᐊᑦᓯᓂᑉᒧᑦ ᖃᐅᔨᒪᒍᑎᓂᒃ ᐊᒻᒪᓗ ᓱᕐᖁᐃᓴᕐᓂᒧᑦ.

ᐱᓇᓱᑦᑕᐅᓂᖓᑕ ᑐᖓᓕᐊ ᐃᓚᖃᓚᐅᔪᔪᖅ ᖃᐅᔨᒪᒍᑎᓂᒃ ᐋᕐᕿᓱᐃᓂᕐᒥᒃ: ᐊᑦᔨᓕᐅᕆᓂᖅ ᐃᓘᓐᓇᖏᓐᓂᒃ ᓇᔪᕐᓱᒋᑦ  ᓄᓇᖕᖑᐊᓕᐊᓂᒃ, ᖃᕆᑕᐅᔭᒨᕐᙯᓂᖅ ᓄᓀᑦ ᐊᑎᖏᓐᓂᒃ, ᐊᓪᓚᓅᕆᓂᖅ ᐊᒻᒪᓗ ᖃᕆᑕᐅᔭᒨᕐᙯᓂᖅ/ᓇᑲᑎᕆᓂᖅ ᓂᐱᓂᒃ ᑕᑯᓐᓇᕋᑦᓴᓂᓪᓗ ᓂᐱᓕᐅᕐᓯᒪᔪᓂᒃ ᐊᒻᒪᓗ ᐅᖃᕕᒎᓕᕐᑎᓯᓂᖅ ᐃᓗᓕᕐᓂᒃ ᐊᒻᒪᓗ ᓂᐱᓕᐅᕐᓂᖅ ᓄᓀᑦ ᐊᑎᖏᓐᓂᒃ (ᐅᖃᕐᑕᐅᒍᓯᖏᑦ).

ᐱᓇᓱᑦᑕᐅᓂᖓ ᑭᖑᓪᓕᐹᖅ ᐱᑦᔪᑎᖃᓚᐅᔪᔪᖅ ᓄᐃᑦᓯᓂᕐᒥᒃ ᖃᐅᔨᒪᒍᑎᓂᒃ ᖃᕆᑕᐅᔭᒃᑯᑦ ᐅᒃᑯᐃᕕᒻᒧᑦ ᐃᓚᐅᕐᑐᓯᒪᑎᓪᓗᒋᑦ ᑲᒪᒋᐅᑎᒍᑎᓂᒃ ᐊᒻᒪᓗ ᓴᓇᖃᑎᒌᑦ ᓄᓇᖕᖑᐊᖏᓐᓂᒃ ᐃᓚᖃᕐᑎᓗᒍ ᑕᑯᓐᓇᕋᑦᓴᓂᒃ, ᐊᑦᔨᖑᐊᓂᒃ ᐊᒻᒪᓗ ᓂᐱᓕᐅᕐᓯᒪᔪᓂᒃ. ᖃᐅᔨᒪᔭᑦᓴᓕᒫᑦ ᑲᓱᕐᕕᖃᓚᐅᔪᔪᑦ ᐱᐅᓯᑐᖃᕐᓂᒃ ᓄᓀ ᐊᑎᖏᓐᓂᒃ ᓄᓇᖕᖑᐊᒦᑦᑐᓂᒃ. ᑖᓐᓇ ᐊᑐᕋᑦᓴᖅ ᐊᑐᐃᓐᓇᕈᓚᖓᓚᐅᔪᒻᒥᔪᖅ ᑎᒍᒥᐊᒐᕐᓂ ᖃᕆᑕᐅᔭᓂ.

ᐱᓇᓱᑦᑕᕕᓃᑦ ᓄᓇᖕᖑᐊᑦ ᐃᓚᖃᓚᐅᔪᔪᑦ 221-ᓂᒃ ᓄᓇᐅᑉ ᖄᖓᑕ NMR-ᒥ ᓄᓇᖕᖑᐊᖏᓐᓂᒃ ᐊᖏᓂᓕᓐᓂᒃ 1:50,000-ᒥᒃ ᐊᒻᒪᓗ 19-ᓂᒃ ᓄᓇᖕᖑᐊᓂᒃ ᓄᓇᐅᑉ ᑲᖏᕙᒥᓐᓂᖓᓄᑦ ᐊᖏᓂᖃᕐᑎᓗᒋᑦ 1:250,000-ᓂᒃ.

ᓄᓇᓕᓐᓂᒃ ᐃᓱᒪᑦᓴᓯᐅᕈᑏᑦ ᐊᑐᓚᐅᔪᔪᑦ 11-ᓂ ᓄᓇᓕᓐᓂ (ᑲᖏᕐᓱᐊᓗᒃᔪᐊᖅ, ᑰᑦᔪᐊᖅ, ᑕᓯᐅᔭᖅ, ᐊᐅᐸᓗᒃ, ᑲᖏᕐᓱᒃ, ᖁᐊᕐᑕᖅ, ᑲᖏᕐᓱᔪᐊᖅ, ᓴᓪᓗᐃᑦ, ᐃᕗᔨᕕᒃ, ᐊᑯᓕᕕᒃ ᐊᒻᒪᓗ ᐳᕕᕐᓂᑐᖅ) ᐊᒻᒪᓗ ᐱᑕᖃᓚᐅᔪᑦᓱᑎᒃ ᐊᑕᖏᕐᓯᒪᔪᓂᒃ ᐊᑕᐅᓯᐅᓈᕐᑎᑐᓂᓪᓗ ᐊᐱᕐᓱᕈᑎᓂᒃ. ᑲᑎᑦᓱᒋᑦ 85 ᐃᓄᐃᑦ ᑲᑎᒪᓂᐊᕈᓯᕐᓂ ᐃᓚᐅᖃᑦᑕᓚᐅᔪᔪᑦ, ᓄᐃᑦᓯᓱᑎᒃ 126-ᓂᒃ ᑫᕙᓪᓚᒍᓯᕐᑐᑐᓂᒃ ᓂᐱᓕᐅᕐᓯᒪᔪᓂᒃ.

ᓄᓇᓖᑦ ᓯᑕᒪᑦ ᓱᓕ ᐱᔭᕇᒋᐊᖃᖏᓐᓇᑐᑦ: ᓄᓇᓖᑦ ᒪᕐᕈᐃᑦ ᑎᑭᑕᐅᓚᐅᔪᖕᖏᑐᑦ (ᐃᕗᔨᕕᒃ ᐊᒻᒪᓗ ᐳᕕᕐᓂᑐᖅ) ᐊᒻᒪᓗ ᓄᓇᓖᑦ ᒪᕐᕈᐃᑦ (ᑕᓯᐅᔭᖅ ᐊᒻᒪᓗ ᑲᖏᕐᓱᒃ) ᐃᓓᓐᓇᖓᑎᒍᑦ ᐱᔭᕇᕈᑕᐅᓚᐅᔪᑦᓱᑎᒃ.

ᖃᐅᔨᒪᒍᑎᓂᒃ ᐋᕐᕿᓱᐃᓂᖅ

1.   ᐊᑦᔨᓕᐅᕆᓂᖅ ᓇᔪᕐᓱᒋᑦ ᓄᓇᖕᖑᐊᓕᐊᕕᓂᕐᓂᒃ

ᐱᓇᓱᒍᑕᐅᓯᒪᔪᑦ ᓄᓇᖕᖑᐊᑦ ᐃᓘᓐᓇᑎᒃ ᐊᑦᔨᓕᐅᕐᑕᐅᓚᐅᔪᔪᑦ ᐱᓇᓱᒋᐊᕐᑐᓯᒪᓂᐅᑉ ᑭᖑᓂᖓᓂ. ᐊᑦᔨᓕᐊᕕᓃᑦ ᓇᔪᕐᑎᒋᔭᐅᔪᑦ ᐊᕙᑕᒃᑯᓄᑦ. ᓯᕗᓪᓕᐹᑦ ᓇᔪᕐᓱᒋᑦ ᓄᓇᖕᖑᐊᓕᐊᕕᓃᑦ ᓯᓈᓃᑦᑐᓄᑦ ᓄᓇᓄᑦ (1:50,000) ᓇᔪᕐᑎᒋᔭᐅᔪᑦ ᒪᑭᕝᕕᑯᓐᓄᑦ ᐊᒻᒪᓗ ᐊᒥᐊᒃᑯᖏᑦ ᓄᓇᖕᖑᐊᑦ (1:250,000) ᐊᕙᑕᒃᑯᓃᑦᓱᑎᒃ.

2.   ᖃᕆᑕᐅᔭᒨᕐᙯᓂᖅ ᓄᓀᑦ ᐊᑎᖏᓐᓂᒃ

ᐊᑦᔨᓕᐅᕐᑕᐅᓯᒪᔪᓕᒫᑦ ᓇᔪᕐᓱᒋᑦ ᓄᓇᖕᖑᐊᓕᐊᕕᓃᑦ ᖃᕆᑕᐅᔭᒨᕐᖃᓯᒪᔪᑦ ᐊᒻᒪᓗ ᓄᑖᖅ ᓴᓇᒻᒪᓂᒃ/ᓄᓇᓂᒃ ᖃᐅᔨᒪᒍᑎᖃᐅᑎ ᐱᖕᖑᑎᑕᐅᓯᒪᑦᓱᓂ.

• ᓱᓇᒥᑦᑐᑦ ᖃᐅᔨᒪᒍᑏᑦ ᐃᓄᒃᑎᑐᑦ ᓄᓀᑦ ᐊᑎᖏᓐᓂᒃ ᐃᓗᓕᓖᑦ 8,169-ᓂᒃ ᑕᕐᓯᕈᑎᓂᒃ

• 3,869 ᓄᓀᑦ ᐊᑎᖏᑦ ᐅᕝᕙᓗᓘᓐᓃᑦ 47%-ᖏᑦ ᐃᓱᒪᒋᔭᑦᓴᐅᓕᕐᑐᑦ ᓱᕐᖁᐃᓚᕆᒋᐊᖏᑦ

• 4,300 ᓄᓀᑦ ᐊᑎᖏᑦ ᐅᕝᕙᓗᓘᓐᓃᑦ 53%-ᖏᑦ ᓱᕐᖁᐃᓚᕆᕋᑕᖕᖏᑐᑦ

ᐱᓇᓱᐊᑦᓴᖅ ᑐᕌᓗᐊᖕᖑᐊᓚᐅᔪᒻᒪᑦ ᑕᑯᓇᓱᓐᓂᒧ ᐃᓄᐃᑦ ᓄᓇᓂᒃ ᐊᑎᖃᕐᑎᓯᒍᑎᖏᓐᓂᒃ NMR-ᒥ, ᓱᕐᖁᐃᓴᕐᓂᖅ ᓄᓀᑦ ᐊᑎᖏᓐᓂᒃ ᐊᒻᒪᓗ ᖃᐅᔨᒪᒍᑎᓂᒃ ᑲᑎᕐᓱᐃᓂᖅ ᓄᓇᕕᐅᑉ ᐃᓘᓐᓇᓕᒫᖓᓂᒃ ᓱᓇᒥᑦᓯᓚᐅᔪᖕᖏᑐᖅ. ᒪᑯᐊ ᑕᒐ ᑭᓯᒍᑕᐅᓯᒪᔪᑦ ᓄᓀᑦ ᐊᑎᖏᓐᓂᒃ ᑕᕐᓯᓯᒪᔪᓂᒃ ᐊᑦᑐᐊᓱᑎᒃ NMR-ᒧᑦ (ᑐᖕᖓᕕᖃᕐᓱᓂ NMR ᑭᓪᓕᖏᓐᓂᒃ ᑐᖕᖓᕕᓕᓐᓂᒃ LWI-ᖑᖕᖏᑐᓂᒃ ᓯᓂᓂᒃ ᐊᒻᒪᓗ ᐃᓓᓐᓇᖓᓂᒃ ᐃᒪᕈᕐᑕᑐᓂᒃ ᐊᒻᒪᓗ ᓯᑦᔭᓗᑐᖓ ᑭᓪᓕᕆᔭᐅᑎᓐᓇᒍ, ᑕᒪᓐᓇ ᐃᓗᓕᖃᕋᔭᕐᒥᒪᑦ ᐊᒥᓱᒋᐊᓪᓚᓂᒃ ᐊᑎᕐᓂᒃ).  

• ᑲᑎᑦᓱᒋᑦ ᓄᓀᑦ ᐊᑎᖏᓐᓄᑦ ᑕᕐᓯᕈᑏᑦ ᐅᓄᕐᓂᖏᑦ NMR ᐃᓗᐊᓂ: 2,156

• 1,293 ᐅᕝᕙᓗᓘᓐᓃᑦ 60% ᐃᓱᒪᒋᔭᐅᒍᓐᓇᑐᑦ ᓱᕐᖁᐃᓚᕆᒋᐊᖏᑦ

• 863 ᐅᕝᕙᓗᓘᓐᓃᑦ 40% ᓱᕐᖁᐃᓚᕆᕋᑕᖕᖏᑐᑦ

3. ᐊᓪᓚᓅᕐᙯᓂᖅ ᐊᒻᒪᓗ ᓇᑲᑎᕆᓂᖅ ᓂᐱᓕᐊᕕᓂᕐᓂᒃ ᑕᑯᓐᓇᕋᑦᓴᓕᐊᕕᓂᕐᓂᓗ, ᐃᓗᓕᕐᓂᒃ ᐅᖃᕕᒎᓕᕐᑎᓯᓂᖅ – ᐱᔭᕇᕐᓯᒪᔪᑦ

ᑕᒪᓐᓇ ᐱᓇᓱᓐᓂᖅ ᓄᐃᑦᓯᒍᑕᐅᓚᐅᔪᔪᖅ 39-ᓂᒃ ᓄᓇᐅᑉ ᐊᑎᖓᓄᑦ ᐊᑦᑐᐊᔪᓂᒃ ᐅᓂᒃᑳᑐᑦ ᓂᐱᖏᓐᓂᒃ. ᑖᒃᑯᐊ ᐱᓯᒪᑦᓴᑐᐃᓐᓇᑐᑦ 7-ᑐᐃᓐᓇᓂᒃ ᓄᓇᓕᓐᓂᒃ.

1.   ᓂᐱᒧᑦ ᓂᐱᓕᐅᕐᓂᖅ ᓄᓀᑦ ᐊᑎᖏᓐᓂᒃ (ᐅᖃᕐᑕᐅᒍᓯᖏᑦ)

ᑕᒪᑐᒪ ᐱᓇᓱᑦᑕᐅᓂᖓ ᐱᔭᕇᓪᓗᑐᓚᐅᔪᖕᖏᑐᖅ. 1,629-ᓂᒃ ᐅᖃᕐᑕᐅᒍᓯᖏᑕ ᓂᐱᖏᓐᓂᒃ ᐱᑕᖃᓕᕐᑐᖅ ᐃᓚᒋᔭᐅᔪᓂᒃ 8,133-ᓄᑦ ᓄᓀᑦ ᐊᑎᖏᓐᓂᒃ ᑕᕐᓰᒍᑎᓄᑦ ᐅᕝᕙᓗᓘᓐᓃᑦ ᓄᐃᑕᑦᓯᔪᓂᒃ 20%-ᒐᓚᓐᓂᒃ ᑲᑎᓕᒫᕐᓗᒋᑦ ᓄᓀᑦ ᐊᑎᖏᑦᑕ ᐃᓂᖏᓐᓄᑦ.

2.   ᐊᑦᔨᖑᐊᑦ

ᐅᓪᓗᒥᐅᑎᓪᓗᒍ 220-ᓂᒃ ᐊᑦᔨᖑᐊᓕᒃ ᖃᐅᔨᒪᒍᑎᖃᐅᑎᒥ. 178-ᖏᑦ ᐊᑦᑐᐊᔪᑦ 74-ᓄᑦ ᓄᓀᑦ ᐊᑎᖏᑦᑕ ᐃᓂᖏᓐᓄᑦ ᓱᓕ 42 ᐊᑦᔨᖑᐊᑦ ᐋᕐᕿᓱᕆᐊᖃᕐᑎᓗᒋᑦ (ᐊᑦᔨᖑᐊᑦ 81%-ᖏᑦ ᐋᕐᕿᓱᕐᓯᒪᑦᓯᐊᑐᑦ). ᐊᑦᔨᖑᐊᑦ ᐱᓯᒪᕙᓪᓗᑐᑦ ᐊᕙᑕᖅ ᐱᐅᓯᑐᖃᓕᕆᕕᒻᒥᒃ ᐃᓚᖃᕐᒥᓱᑎᒃ ᐃᐊᓪᓴ ᓯᐊᓐᓯᒃ ᓇᒻᒥᓂᖅ ᐊᑦᔨᖑᐊᖁᑎᖏᓐᓂᒃ.